Haurreskola eta gazteleku-ludoteka egoitza berean daude eta elkarri lotuta daude, baina bakoitzak bere sarrera dauka. Haurreskolan dagoeneko hasi dute ikasturtea bost umek, eta 20 bat umerendako lekua dago. Ordura arteko haurreskola Herri Eskolaren egoitzan zegoen, baina txiki geratu zen, "eta Udalarendako ezinbestekoa eta lehentasunezkoa" zen haurreskola zerbitzu egokia ematea. Horretara dator egoitza berria.
Bisita gidatua egin du Rebeka Ubera Hezkuntza zinegotziak: erabilera askotarako gela, sukaldea, bainugela, logela eta kanpoko jolaslekua ditu haurreskolak, eta, pasillo baten bidez, gazteleku eta ludotekari lotuta dago, horiek 10-16 urte arteko ume eta nerabeendako. Oraingoz psikomotrizitate gela moduan erabiltzen den beste espazio bat badu haurreskolak; oraingoz, 2 urtera arteko ume guztiak elkarrekin daudelako, baina, premia sortuz gero, 1 eta 2 urte artekoak gela horretan egongo lirateke.
Arduradunek azpimarratu dute instalazioon bidez haurreskolak zuen plaza kopurua bikoiztu egin dela, eta herritarrok parte hartu zutela haurreskolaren proiektua definitzeko.
Foru Aldundiko Gazteria Sailak, Eusko Jaurlaritzako Nekazaritza eta Gazteria sailek eta Kutxak diruz lagundu diote proiektu horri.