Hilaren 12an, eguenean, egingo dute Elgetan agintaldiko lehenengo osoko bilkura. Plenoa 20:00etan hasiko da.
Oxel Erostarbe alkateak adierazi du hautetsien soldatak erabakiko dituztela egueneko bilkuran. "Ez ditugu kopuruak oraindik erabaki, baina dakiguna da alkatearen soldata jaitsi egingo dela". Plenoan alkatearen soldataz gain zinegotziena ere erabakiko dute.
Batzordeen banaketa
Halaber, egueneko plenoan erabakiko dute batzordeetako arduren banaketa. "Zenbat batzorde izango ditugun aztertzen ari gara egunotan. Egueneko plenoan aurkeztuko dugu gure proposamena", esan du Erostarbek.
Batzordeetako arduren banaketari dagokionez Elgetako Aralar Eusko Abertzale Ekintza-ANVkin negoziatzen dihardu. "Ez dugu oraindik ezer sinatu eta ez dakigu, azkenean, udal gobernuan sartuko diren ala ez".
Patxi Basauriren taldeak, bere aldetik, hasieratik esandakoa mantenduko du. Agintaldi berrian oposizio lana egingo dute taldeko hiru zinegotziak. Ez dira udal gobernuan sartuko eta ez dute batzorderik hartuko. Egueneko plenoan, beraz, gauza asko argituko dira.