Arantzetarrek aste bukaeran egingo dute nazioarteko topaketa. Hiru eguneko egitaraua antolatu dute, baina ekitaldi nagusiak zapatuan egingo dituzte, Elgetan.
Arantzeta auzoan egingo dute lehenengo ekitaldia bertan du-eta sorrera abizenak. Ikerlariek 1375. urtean kokatzen dute abizenaren jatorria. Ingurua, bertako baserriak, ermita eta iturria bisitatuko dituzte 10:00ak bueltan. Elgetarrek ondo ezagutzen duten parajea da, baina Mexiko, Kolonbia edo Venezuelatik etorriko diren Arantzetarrendako momentu oso berezia izango da. "700 bat familia ditugu kontabilizatuta", adierazi digu antolakuntza lanetan diharduen Jose Luis Arantzetak. "Kafe antzokian egingo dugun bazkarirako 150 lagun daude izena emanda".
Haritza san roke osten
Arantzetarrei harrera egingo diete udaletxean, 11:30ean. Jarraian, San Roke ostera egingo dute bertan haritza landatzeko. "Jakin dugu bertan dauden pagoak Arantzeta batek, Agustin Jose Arantzetak landatu zituela 1828an. Egunaren oroigarri, haritza landatuko dugu guk, eta aurreskua dantzatuko da. Haritza landatu dute dagoeneko. Pello Gorrotxategi Arantzetak eta Luis Mari Arantzetak landatu zuten barikuan.
Bazkaria Espaloian
Gosari txikia eta poteoa egingo dituzte jarraian. 8-10 laguneko lan taldea ibili da guztia prestatzen. "Aurreko egunean, barikuan, konferentzia egingo du Endika de Mogrobejo onomastika adituak Bilbon", adierazi du Jose Luis Arantzetak. "Arantzeta abizenaren jatorriaren inguruko xehetasunak emango ditu".
Arantzetarrek webgunea ere sortu dute –aranzeta.org– eta argazki politak lortzen badituzte ez dute liburu bat argitaratzea baztertzen. Espaloia kafe antzokian egingo duten bazkariarekin emango diete amaiera Elgetako ekitaldiei.