Herri eskolak erronka handia du aurten; ikastetxeko Elkarbizitza plana martxan jartzea. Curriculumaren barruan derrigorrezko gauza izango da ikastetxe guztiendako 2010eko ikasturtetik aurrera. "Guk aurten sartzea erabaki dugu", adierazi dute ikastetxetik. "Zenbat eta arinago lanean jarri hobeto izango da. Uste dugu hezkuntzan bizikidetza garrantzitsua dela".
Azaldu dute eskolan dauden lau estamentuek – irakasleek, ikasleek, gurasoek eta zerbitzuetako langileek – hartu behar dutela parte prozesu horretan. "Helburua, aurten, denen artean elkarbizitza zer den jasotzen duen dokumentu bat sortzea da, eta datorren ikasturte hasierarako elkarbizitzako behatokia eratuta lagatzea". Irakasleek osatu dute euren batzordea, orain gurasoena lehenbailehen sortzea komeni da.
Sentsibilizazioa helburu
Guraso batzordearen lana ikastetxeko gurasoen artean programaren inguruko sentsibilizazio kanpaina egitea izango da. "Komeni da Gabonetarako eskolako guraso denei galdetegi batzuk betearaztea, gurasoak talde txikitan antolatzea, eta talde bakoitzak bere definizioa adostea. Datorren hilean martxan beharko luke talde horrek koordinatzailearekin lehenbailehen lanean hasteko".