Hurrengo aste bukaeran, hilaren 25ean ospatuko dugu Santixau eguna eta Goimendi auzoan gertu dituzte urteroko jaiak. Bezperan, hilaren 24an hasiko dira motorrak berotzen berakatz zopekin (21:30) eta Jon Ostolazaren eta Unai Andonegiren trikiti doinuekin (23:00).
Santixau eguna
Ekitaldi nagusiak, baina, zapatuan, hilak 25, egingo dituzte Goimendin. Meza entzungo dute 11:00etan, eta amaitutakoan urteroko soka dantza egingo du Kezka taldeak auzoko plazan. Joxe Agirreren eta Jesus Mari Irazuren bertso saioak emango dio jarraipena egunari. Dantza egitea gustuko dutenendako, berriz, erromeria egingo dute Imanol Astiazaranek eta Izerrek 13:00ak bueltan hasita. Bazkal aurretik umeek ere euren gustuko jolasak izango dituzte. Lasterketa eta lurrezko itsulapikoen apurtzea egingo dituzte, besteak beste.
Herri kirolak
Arratsalderako, 18:00etan hasita programatu dituzte herri kirolak Goimendin. Boleta jokoa ere egingo dute egun horretarako bereziki txukundutako bolatoki ederrean. 19:00etan Agirrek eta Irazuk beste bertso saioa egingo dute. Ondoren, gauerdira arte, Imanol Astiazaranek eta Izerrek hartuko dute lekukoa trikiti doinuekin. Urteroko urdaiazpikoaren zozketa eta txokolate jana 20:00etan egingo dituzte.