Asteon 13 urte betetzen dira herriko gazte talde batek gaur egungo gaztetxearen lokala okupatu zuenetik. Eta urtero legez gaztetxekoek ekitaldi mordoa prestatu dituzte urteurrena ospatzeko.
Zapatuan, hilaren 21ean, egingo dituzte ekitaldi nagusiak. Goizean, mendi irteera egingo dute Intxortara, eta eguerdian trikipoteoa eta herri bazkaria. Gauean, lau taldek emanaldia egingo dute gaztetxean. Gaztetxetik ekitaldiotan parte hartzeko deia egin dute.
Egun osoko egitaraua
Zapatuan, 10:30ean abiatuko dira gaztetxekoak Intxortarantz. Jakinarazi dute izenematea plazan bertan egin ahalko dela 10:00etan hasita. Herri bazkaria 14:30ean egingo dute, eta aurretik trikipoteoa egongo da herrian. Menuan zortzi euro da: makarroiak, solomoa piperrekin, postrea, kafea eta kopa. Bertsolariek bazkalostea girotuko dute, eta 18:00etan batukada iragarri dute antolatzaileek. Izenematea atzo amaitu zen.
Gauerako lau talderen kontzertuak antolatu dituzte gaztetxean. Skakeitan eta Jonny Gerriwelt taldeek emango diote hasiera emanaldiari. Jarraian, herriko bi taldek egingo dute saioa; Sotamano eta Ostiada Oi! taldeak, hain zuzen ere. Kontzertuak 22:30ean hasiko dira gaztetxean.