Espaloiak gertu dauka udazkeneko egitaraua

Datozen hiru hilabeteetarako hamar proposamen egiten dituzte Elgetako kafe antzokitik; ikus-entzunezkoak, musika emanaldiak, antzerki ikuskizunak eta erakusketak, besteak beste. Esaterako, Xabier Letek poesia emanaldia egingo du eta Garik '16 lore' diskoa aurkeztuko du.

Espaloitik pasatuko dira hilabete hauetan Xabier Lete, Gari, Iker Galartza, Joseba Usabiaga, Carlos Lozano eta Belinda Washington. Akaso ez da hain ezaguna, baina Elgetan izango dira halaber, Luthea Salom taldea. Grammy saria irabazi zuen 2001ean Out Of Without diskoarekin eta rock eta jazz doinuak egiten ditu. Jazz doinuak ekarriko ditu, baita ere, Zimbaweko Mokoonba taldeak.

Herritar baten erakusketa

Bi erakusketa hartuko ditu kafe antzokiak hemendik eta urte amaierara bitartean. Abendukoa Manolo Montiel elgetarrarena izango da. Gipuzkoa osoan zehar ibili da arraza ezberdinetako txakurrei argazkiak ateratzen. Egindako lana erakutsiko du kafe antzokian Ezagutu Gipuzkoa: txakurrak herriz herri izeneko argazki erakusketaren bitartez.

Zinekluba eguaztenero

Aste barruan, berriz, eguaztenero zineklub saioekin jarraituko dute kafe antzokian. Saio horiek ez dute udan etenik izan eta abendura bitartean 13 fimekin osatutako programa kaleratu du Espaloiak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.