Joaquin Gastesik eta Mertxe Elorriagak laga egingo dute Erretiratuen elkarteko zuzendaritza batzordea. Ordezkoak Manu Sarasua eta Begoña Ardantza izango dira. Gaur, hilak 27, egingo duten urteko batzar orokorrean onartuko dute aldaketa.
Elgetako erretiratuek, gainera, beste hainbat gai izango dituzte aztergai. Zuzendaritza Batzordeak aurkeztutako gai zerrendan diru kontuak, egoitzaren gainean Udalak eta Ozkarbi elkarteak duten akordioa, eta elkartearen izen aldaketa nabarmentzen dira.
Orain arte Zaharren biltokia izenarekin deitua izan dena Xalbadorpe Erretiratuen Elkartea deitzea proposatuko dute batzarrean. "Egungo deitura ez zaigu gustatzen", adierazi du Zezilio Totorikaguena presidenteak. "Ez zaigu egokia iruditzen. Lau izenekin bueltaka ibili ostean Xalbadorpe Erretiratuen Elkartea izenak harrera ona izan du zuzendaritzan".
