Elgetako udal Gizarte Ongizate saila hasi da martxoaren 8rako ekintzak prestatzen. Argazki erakusketa ipintzeko deialdia egin dute. Herritarrei etxean dituzten argazkiak udaletxera eramateko eskaera egin diete. Argazkiak emakumeekin zerikusia dutenak behar dute. Elgetako emakumeak lanean, paseatzen, karta jokoan, ikastaroak egiten... Denon artean erakusketa polita osatu daitekeela uste dute udal arduradunek.
Argazkiak otsailaren 27rako udaletxera eraman behar dira. Bildutako materialarekin erakusketa ipiniko dute Espaloia Kafe Antzokian martxoko lehenengo astean. Argazkiak sarreran ipiniko dituzte panel handietan. Hil amaierara arte egongo da ikusgai.
Txokolate jana egingo dute
Iaz egin zen moduan, txokolate jana ere antolatuko dute aurten Emakumearen Eguna ospatzeko. Bezperan, martxoaren 7an, egitea aurreikusten dute udaletxetik, 17:00etan hasita. Elgetako emakume guztiak daude bertan parte hartzera gonbidatuta.