Goizeko lehenengo orduetan hasi du elurra botatzen. Udaletxean esan digutenez bide guztiak itxita daude uneotan. Normalean zabalik egoten den Bergararako bidea ere bai. Kamioiak eta autobus bat omen daude gurutzatuta Izarrako bueltan. Elurra kentzeko makinek lanak dituzte bideak zabaltzeko.
Herri barruan autoarekin mugitzeko arazoak daude. 4x4 autoak dituztenak bakarrik ausartu dira errepidera ateratzen. Herritik kanpo lan egiten duen elgetar askok etxean gelditzeko erabakia hartu du gaur.
Herri eskola, bestetik, itxita aurkitu dute gaur goizean umeek. Esan dutenez ez da irakaslerik igo. Liburuak alde batera utzi eta elurretan jolasteko eguna izango da gaurkoa.