Elgetako txirrindularitza elkarteak egindako deiak izan du erantzuna. 23 urtez Mendi Kriteriuma antolatu ostean, elkartekoek erreleboa eskatzen dute eta dozena bat lagun elkartu dira kultura etxean egindako azken batzarrean. “Pozik nago lasterketak edizio berria izango duelako, baina erantzun handiagoa espero nuen jendearen aldetik”, esan du batzarraren amaieran Elgetako Txirrindularitza Elkarteko presidente Emilio Mandalunizek. "Gazte batzuk hurbildu dira eta espero dut horien atzetik gehiago animatzea".
Lanean hasteko premia
Mandalunizek eta harekin batera azken urteotan 23 urte azpikoendako den lasterketa antolatu dutenek data eskatua zuten Federazioan. "Eguna hartuta dago, uztailaren 20an egingo dugu. Orain zozketa-txartelak aterako ditugu herritarren arten saltzeko eta, hortik aurrera, lanean hasi beharko dugu guztia antolatzeko. Lan handia dugu aurretik".
Mandalunizek kargua uzteko asmoa agertu du. "Presidente kargua hartuko duenari gustatu egingo zaio. Lan oso polita da", adierazi du. Prest agertu da lantalde berriari egitekoak zeintzuk diren erakusteko. "Gertu nago bi urtez gauzak nola diren erakusteko", adierazi du.
Ibilbide aldaketa
Salbador kaleko urbanizazio lanak direla-eta, lasterketa ezingo da aurten erdigunetik igaro. "Ibilbidea aldatu egin behar dugu", esan du Mandalunizek. "Tropela, aurten, saihesbidetik bideratu beharko dugu". Lantaldeak finkatuta dauka hurrengo bilera. Astelehenean, hilak 9, egingo dute 19:00etan Kultura Etxean.