Kadete mailako norgehiagokarekin hasiko dute gaur, egubakoitza, gauean Elgetan Lau t'erdiko Txapelketako finala. Zeingehiagoka horretan Urbieta eta Galartza izango dira zein baino zein gehiago –finalean ez dago ibarreko ordezkaririk–. Eta, ondoren jokatuko dute seniorrek. Antolatzaileen esanetan, Urrutikoetxea da faborito, baina aho txikiarekin esaten dute, Renobales txapelketa biribila egiten dabil-eta. Alegiako ezkertiarrak txapelketako faborito Aitor Mendizabal kanporatu zuen lehenengo, eta ondoren, Onzalo bidali zuen kanpora. Gaurko jaialdia ETBk eskainiko du zuzenean, eta astelehenean GOITBko Harmailatik saioko ardatzetako bat izango da.