Gaurtik aurrera II. Aste Berdea egingo dute Elgetan ura ardatz hartuta. Herri eskolak Udalarekin batera antolatutako ekimena da, eta zortzi ekintza iragarri dituzte zapatura arte luzatuko den Aste Berdearen barruan.
Ur kontsumo arduratsuaren inguruko hausnarketa bultzatzea da ekimenaren helburua eta aurreko urtean egin zen moduan etxeko iturrietan ipintzeko txorrotak banatuko dituzte.
Egitaraua
Martitzenean, hilak 3, irteera egingo dute herriko iturriak ezagutzeko. Eguaztenean, Aixola errekaren bueltan ibiliko dira, eta 15:00etan 'Ura beste begirada batetik' dokumentala ikusteko aukera egongo da Herri Eskolan. Eguen goizean eskolan egindako lanak ipiniko dituzte ikusgai herriko plazan, eta txorrotak banatuko dituzte herritarren artean. Barikuan, Zaldibiako Ur interpretazio gunera joango dira eta zapatuan, 17:00etan hasita, jolasak izango dituzte plazan.