Kezka agertu dute goizean Iñaki Ugarteburuk eta Patxi Basaurik –Hamaikabat eta EAJren izenean– eta bi adibide jarri dituzte:
- Lehena: udal aparejadorea zena kaleratu eta haren tokia betetzeko beste pertsona bat hartu izana. Erabaki horren harira izandako epaiketa galdu egin du Udalak eta horrek suposatu duen kostua –53.000 euro– elgetarrak ari dira ordaintzen, Ugartebururen hitzetan.
- Bigarren adibidean azaldu dute lehen teknikari t'erdik egiten zituzten lanetarako soilik erdi bat dagoela orain. Hau da, lanaldi erdira dagoen pertsona bat arduratzen dela gaur egun hezkuntza, euskara, kultura, turismo, jai eta kirol kontuetaz. "Horren eraginez, atzera egin du herrian kirol dinamika bultzatzeko martxan jarritako Egoki taldeak; bide onetik zihoan eta erdi hilda dago orain", Elgetako Abertzaleak taldeko ordezkarien iritziz. Eta atzera pausoak ikusten dituzte eskola kirolean ere: "Parte-hartzea jaitsi egin da eta gurasoen inplikazioa galdu".
Aurrekontuaren alde bozkatzeko arrazoiak
Duela hamabost egun onartutako udal aurrekontuari ere egin diote erreferentzia. Faltan botatzen dute eurek proposatutako aldaketa batzuk –Berraondokoa industria-gunearekin eta Artekaleko uralitazko fatxadekin lotuta aurrera pausoak ematea edota kiroldegiko gimnasioan isolamendu egoki bat egitea– onartu ez izana. Baina pozik daude, eurek proposatu moduan, diru partidak onartu direlako Elgetatik Asentziora bidegorria egitea aztertzeko, Domingo Iturbe Patronatuari irtenbide bat emateko estudio bat egiteko edota udal langileen formazioa berrezartzeko. Horregatik eta krisi garaian gaudelako babestu zuen Elgetako Abertzaleak taldeak 2010eko aurrekontua. Kritika bat ere egin dute, ordea: "Aurrekontuan 135.000 euroko kreditu bat sartu dute eta, horrekin, Udalaren zorpetze-maila %16ra heltzen da; aurreko agintaldikoaren bikoitza hori".