Zazpi ikastetxek jokatu zuten zapatuan eskola arteko Gipuzkoako herri kirolen txapelketa Lazkaon; tartean, Elgetako ordezkariak. Ione Elkoro, Aitor Elkoro, Etor Zubiaurre, Andoni Zubiaurre, Unai Andres, Veronica Azkarraga eta Irune Errasti harro egoteko moduan daude lan oso txukuna egin zuten-eta txapelketan.
Makina lan egin zuten
Zaku eramatea, jende proba, lokatzak, txingak eta sokatira izan ziren egin beharreko probak. Elgetako taldea izan zen ordezkari gutxien zituen taldea, eta, hortaz, makina lan egitea egokitu zitzaien taldeko zazpi kideei. Zalantza barik, abantaila handia izan zen hori lehiako gainerako taldeendako. Lazkaoko ikastetxea nagusitu da aurten txapelketan, baina elgetarrak pozik egoteko moduan daude. Herriak eta ikastetxeak bere presentzia izan du lehiaketan. Zorionak!