Elgeta Danon Artian gai konkretuen gainean elgetarren iritzia jasotzeko
ahalegina da egitasmoaren aurkezpenean udaleko ordezkariek azaldu
dutenez. Zentzu horretan, herritar guztien partaidetza eskatzen dute. Adierazi dutenez parte hartzeko formulak dira kudeaketa eredu berriaren
muina, eta horregatik egiten dute parte hartzeko gonbita.
Helburuko horrekin, 8 foro abiarazi nahi dituzte, bakoitza alor bati
lotuta. Hala, elgetako mugikortasuna, legealdiko plana, Agenda 21eko
ekintza plana, PER-a berritzea, kirol azpiegiturak eguneratzea, herriko
komertzioa indartzea, herriko nekazaritzari bultzada ematea eta
zaborraren kudeaketa jorratuko dituzte datozen hilabeteetan. Uztaila
bitartean, apurka apurka jarriko dira martxan foro hauek,lehena,
Mugikortasunaren ingurukoa da datorren hilean bertan. izena eman
beharko da foroetan parte hartzeko. Zenbait kasutan baina, hitzaldi irekiak ere antolatuko dituzte. Baina
foroez gain, bihar bertan herriko hainbat gairi buruzko 68 galderaz
osatutako inkesta bat banatuko dute etxez etxe.
Hamasei urtetik gorako edozein elgetarrek erantzun ahalko du inkesta,
hori bai abenduaren 16a baino lehen. Internet bidez ere lortu ahalko
da, udalaren webgunean hain zuzen ere. Inkestaz gain, bihar foroetan
parte hartu ahal izateko formularioa ere banatuko dute, eta baita
mugikortasunaren inguruan udaletxean landu dutena ere. Oxel Erostarbek
esan du foroetan jasoko diren ondoriok eta eskaerak aintzat hartuko
direla, eta herriko elkarte eta taldeekin ere jarriko direla
harremanetan. Egitasmoaren helbide elektronikoa ere jarri dute martxan,
herritarrek izan dezaketen edozein zalantza argitzeko.