Atzo, Udalak Aldundiaren Kudeatuz programaren bitartez martxan jarriko duen Elgeta 2020 hausnarketa prozesua aurkeztu zuten Espaloian. “Hamar urte barru nahi dugun Elgeta marraztu nahi dugu”, adierazi dute udal arduradunek. Orain, helburua da udalean landutako zirriborroa herritarrekin kontrastatzea, proposamen zein ekarpen berriak jasotzea eta lehentasunak zehaztea.
Parte hartzeko bideak
Hiru bilera egingo dituzte; azaroaren 4an eta 18an, eta abenduaren 2an. Bilera irekiak izango dira eta herritar guztiak daude gonbidatuta, baina udaletxean izena ematea komeni da. Parte hartzeko, gainera, bestelako bideak ere badaude; herritarren buzoia (udaletxeko sarreran), udal webgunean, danonartian@elgeta.net edo facebooken bitartez “elgeta 2020” orrian.