Domingo Iturbe kalean espaloia zulatzen dihardute egunotan beharginek. Aparkaleku berriak egiteko ari dira lanotan. "Egindako inkesta batean jendeak argi esan du aparkaleku arazoa dugula herrian", adierazi zuen Iban Retolaza hirigintza zinegotziak. Hala, hamar bat aparkaleku berri egiteko proiektua abiarazi zuten udaletxean.
Aparkalekuak datutan
Retolazak esku artean dituen datuen arabera 750 bat ibilgailu daude Elgetan. Erdigunean 300 aparkaleku daude eta kalkulatzen da garajeetan 500 ibilgailurendako plazak daudela. "Zenbakiak ez dira hain aldrebesak. Egia da eguneko momentu puntual batzutan badauzkagula arazoak, eguerdian esaterako… hor Udalaren politika izango da malgu jokatzea, eta ez dut uste momentu puntual baterako sortu behar dugunik aparkamendu pila bat".