Iaz jokatu zen herri mailako I. Frontenis txapelketa. Izandako arrakasta ikusirik, bigarren edizioa egiteko prestaketa lanetan dihardu Asier Osoro elgetarrak. "Parte hartzeko interesa duten bikoteek izena eman dezakete datorren astetik aurrera Espaloia kafe antzokian", adierazi du. Bikoteko bost euro ordaindu beharko dela azaldu du, baita txapelketa 16 urtetik gorako elgetar guztiei dagoela zabalduta. Osorok azaldu du iaz bezala herri mailako txapelketa egitea dela asmoa. Partidak zapatu arratsaldetan eta domeka goizetan jokatuko dira.
Iaz 17 bikote
Iaz 17 bikote mugitu zituen Frontenis txapelketak; gizonezkoen txapelketan hamar bikote aritu ziren, eta emakumezkoenean, berriz, zazpi. "Ikusiko dugu aurten zenbat jende animatzen den", esan du Osorok. "Horren arabera antolatuko ditugu partiduak eta txapelketa bera. Lehenengo norgehiagokak Gabonetako oporren ostean hastea nahiko nuke".