37 langile ditu Elgetako Cie Alfa Deco lantegiak, eta otsailetik egon dira lan erregulazioan. Zuzendaritzak, orain, lau langile kaleratzea aurreikusten du eta LABek ordezkari sindikala den Iskandar Sarasketak adierazi du ezin dutela "bide hori zabaltzen laga".
Itxita egon da gaur Cie Alfa Deco, eta langileak eguerdian batu dira lantoki atarian. Manifestazio egin dute industria-gunean, eta herriko plazara eraman dute euren salaketa 12:30ean hasi duten kontzentrazioan. "Langileekin kontatu behar dutela uste dugu", adierazi du Sarasketak. "Are gehiago krisi egoera hau guk sortu ez dugunean".
Negoziazio mahaia
Enpresako langileek negoziazio mahaia behartu nahi dute lehenengo mobilizazio honekin. Aurrera begira zein pauso emango dituzte zuzendaritzaren erantzunaren arabera erabakiko dutela adierazi dute.
Zuzendaritza
Behin baino gehiagotan saiatu arren, ez dugu Cie Alfa Deco enpresako zuzendaritzarekin harremanetan jartzerik izan gaiaren inguruko bere iritzia jaso ahal izateko.