Lehenengo Travelling Brothers taldeko musikariak igo ziren Elgetako Espaloia antzokiko agertokira. Leioako boskote elektrikoak oso kontzertu dinamikoa eta erritmikoa eskaini zuen han bildu ziren ehun lagunetik gorakoen aurrean. Ordubete inguru iraun zuen emanaldian bluesa izan zen nagusi, swing ukituekin.
Bizkaitarrek jo zituzten kantu gehienak eurek sortutakoak ziren. Bereziki, Gaztelupeko Hotsak zigiluarekin joan den urtean taldeak argitaratutako Red, Hot & blue! izeneko laneko abestiak jo zituzten; baina baita kalean dituen beste bi diskoetako kantuak ere: A Blues Experience. Live From Kafe Antzokia eta From The Road izenekoak, hain zuzen ere.
Hiru gitarra
Jarraian, Bill Lyerly beteranoaren txanda iritsi zen. Musikan 30 urte luze daraman amerikarrak Gaztelupeko Hotsakekin kaleratutako Too Hurt To Cry. The Best of Bill's Blues izenburuko diskoa aurkeztu zuen. Hiru gitarra ezberdin tartekatu zituen egubakoitzean eskainitako emanaldian. Bluesa eta rock-and-roll esparrutik jo zuen. Bill Lyerly estatubatuarrak ordu eta erdi inguru eman zuen agertoki gainean, jendeak bi bider hala eskatuta.