Forman egoteko jarduera fisikoren bat egitea nahi duten elgetarrendako gertu dago ikasturte berrirako udal programa. Urrian hasiko dira saioak eta lehenengo hamabostaldian jarduera ezberdinak doan ezagutzeko aukera izango dute interesatuek. Iazko prezio berdinak mantentzeko erabakia hartu du Udalak eta langabetuei %10eko deskontua egingo zaie.
Iaz moduan Goiena Sport enpresarekin elkarlanean antolatu du Udalak kirol eskaintza. "Planteamendua zen adin tarte guztiendako eskaintza egitea eta eskaera hori asetzen saiatu gara", adierazi du Goiena Sport enpresako kide Bixen Calzonek.
Izenematea zabalik
Hasiera batean iaz izandako eskaera kontuan hartuta spinning saioetarako hiru talde osatzeko aukera emango dute aurten. "6-8 urte bitarteko umeendako jolas saioetan koordinazioa, eta oreka moduko gauzak landuko ditugu", azaldu du Calzonek. "Kirol hastapena da, kirol espezializatu batera jo nahi duen umearendako aproposa". Goiena Sport enpresaren kudeaketatik kanpo gelditzen den psikomotrizitate ikastaroa bi urteko umeei zabaltzen zaie aurten, eta nagusiek tai txi zein yoga egiteko aukera ere izango dute. Izena emateko udaletxera jo behar dute interesatuek edo kirolak@elgeta.net helbidera zuzendu behar dute.