Arratsaldean, gaztetxeak antolatutako Sagardo Egunak hartu zion lekukoa azokari. Haurrek gozatu egin zuten jolasean, eta hainbat herritarrek mantela jantzi eta sukaldari lanak egin zituzten, tortillarik onena nork egingo. Pello Bilbaok eta Oskar Sarasuak osatutako Juizioa taldeak irabazi zuen lehiaketa.
Herri afaririk ez-eta txitxi-burruntzia egin zuten 30 bat lagunek; parrillan erretako saiheskia eta txorizoa janez, afari-pasara egin zuten.
Eta gauean, musika: Plan B, Sumision City Blues eta UK Bill taldeek kontzertua eman zuten gaztetxean. Hiru taldeak egon ziren ondo, nahiz eta Plan B-k jo zuen momentuan batu zen jende gehien.
Vespa eta Lambretta
Domeka goizean, motor hotsarekin esnatu ziren elgetarrak. Fresko egiten zuen lehen orduan eta eskuak hoztuta iritsi ziren motorzaleak herrira. Vespa eta Lambretta, 70 bat batu ziren guztira; horietako batzuk, sidekar eta guzti.