Eskuragarri dago Galdare enpresak Elgetako Udalarendako egindako Barne-barnetik Elgeta ikus-entzunezkoa. Eguenean, hilaren 7an, egin zuten aurkezpen ekitaldia Espaloian. Kafe antzokiko pantaila handia eman zuten 25 minutu irauten duen ikus-entzunezkoa.
Bertan izan ziren, besteak beste, turismo zinegotzi Edurne Alberdi eta Galdare enpresako ordezkari Alberto Urigoitia. "Elgeta herri txikia izanik kultura eskaintza handia dauka", esan zuen Galdareko Alberto Urigoitiak. "Gipuzkoa osoan beste 30 udalerriren gaineko ikus-entzunezkoak egin ditugu eta izugarria da hemen dagoen mugimendua".
Turismo promoziorako
Herritarrek eskuragarri dute ikus-entzunezkoa bost eurotan. "Mila ale atera ditugu eta Ana Mariren dendan zein Espaloian daude salgai", adierazi du turismo zinegotzi Edurne Alberdik. "Lana turismo promoziorako ere erabiliko dugu".
Galdare enpresak turismo promoziorako produktuetan espezializatuta dago. "FITUR azokan izan gara eta Euskal Herriko hainbat herriren DVDak erakutsi ditugu bertan. Interneten dugun telebistan ere, travel telebistan, zintzilikatuta daude bideo horiek. Laster jarriko dugu Elgetakoa ere", azaldu du Urigoitiak. Ikus-entzunezkoak Elgetaren kokapena, historia eta herriak egun eskaintzen duen aisi proposamenak jasotzen ditu.