Amaitu dituzte konponketa lanak udal pilotalekuan eta aste bukaerarako prest egongo da. Barikuan, lau t'erdiko ETB Kantxa txapelketako lehenengo partiduak jokatuko dira. Zapatuan, berriz, frontenis txapelketako finalak.
Hiru astez itxita
Maiatzaren 18az geroztik egon da itxita udal pilotalekua. Argiteria berritu dute, hormetan zeuden pintura kapa ezberdinak kendu dituzte, eta atzera margotu egin dute. "Udalak ez du konponketa lan horiek egiteko dirurik ipini. Zati bat Gipuzkoako Foru Aldundiak jarri du, eta bestea azken aldiz pilotalekua margotu zuen Antzibar enpresak".
Orain, pilotalekua estreinatzeko unea iritsi da eta barikuan, hilak 5, festa txiki bat antolatu dute bertan lau t'erdiko pilota txapelketakoek Udalaren laguntzarekin. Txapelketaren aurkezpena egiteko aurreko urteetan txapeldun izandako eta egun profesionalak diren pilotariak etorriko dira Elgetara. Herriko umeekin arituko dira pilotan 20:00etan hasita.
Partidu interesgarriak
Jarraian, 21:30ean, txapelketako lehenengo hiru norgehiagokak jokatuko dira. Aurrez aurre izango dira Ollo eta Rico, Mendizabal eta Linzoain, eta Renobales eta Garralda. Guztiak 23 urtez azpikoak.