Maria Asun Agirrek eta haren ahizpa Maribelek bihar, zapatua, zabalduko dute denda azken aldiz. 1968ko maiatzean zabaldu zuten komertzioa Baltxongokuek. Harrezkero, 40 urte igaro dira eta asko aldatu dira gauzak bai dendan, bai Elgetan: “Lehenengo denda txikia zen oso”, gogoratzen du Maria Asunek. “ Denetarik saltzen genuen: aspirinak, espartinak, ontziak, papera... Azukrea, kafea eta antzerakoak zaku handietan etortzen ziren eta soltean saltzen genituen. Figurak ere saltzen genituen. Garai hartan kanpotar asko etorri ziren Elgetara bizi izatera, eta etxeak apaintzeko erosten zituzten”.
Pena handiarekin ixten duela aitortu digu Maria Asunek. “Garai onak eta txarrak izan ditugu dendan, baina oroitzapen oso onak ditut. Tertulia ederrak egin ditugu hemen! Familia giroa izan dugu beti”.
Errentan emateko aukera
Salbador kaleko urbanizazio lanak tarteko erabaki dute Baltxongua ixtea. “Errentan eman gura dugu eta egin digute kuku bat, baina nahiago dut lanak amaitu arte itxaron”. Herrian, bitartean, janari denda bakarra izango dugu.