Bailarako 83 lagun omendu dituzte odola emateagatik

Gaur 165 odol emaile bildu dira Elgetan eta 190 intsignia banatu dituzte. Omenduak Antzuola, Bergara, Elgeta, Oñati eta Debabarreneko herritarrak izan dira. Zilarrezko intsignia jaso dituzten 113 pertsonetatik 50 izan dira debagoiendarrak, urrezkoa jaso dituztenen 60 lagunetatik 25 eta odol emaile bikainei banatu zaizkien 17 sarietatik 8 izan dira debagoiendarrei emandakoak. Eguerdian banatu dituzte sariok Espaloian eta omenaldiaren ostean, bazkaria izan dute.

Odol emaileen beharra

Xabi Urzelai Gipuzkoako odol emaileen presidenteak azpimarratu du, ezinbestekoa dela odol emaileen kopuruak gora egitea: “Gaur egun 17.500 odol emaile gaude Gipuzkoan eta hemendik hiru urtera beharrezkoa izango da gutxienez, 20.000 odol emaile egotea. Horrek esan nahi du, Gipuzkoako 100 biztanletatik hiru odol emaileak izan beharko garela”.

Bereziki nabarmendu du gazte jendea behar dutela odola emateko eta horretarako, dagoeneko kanpaina batzuk martxan jarri dituztela.


Urzelai presidenteak gaineratu du, laster odola emateko legeetan aldaketa batzuk egongo direla eta nekezagoa izango dela odola ematea, izan ere, odol emaileek baldintza gehiago hartu beharko dituzte kontuan odola eman aurretik. Beraz, odola emateko zailtasun gehiago jarriko direnez, odol emaile gehiagoren beharrean daudela gogorarazi du.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.