Oroimenaren garbiketa egin eta barkamena eskatzea da zapatuko elizkizunaren helburua. Guztira 14 izango dira omendutako apaizak. Gerra irabazi zutenek 1936 eta 1937 urteetan hil zituzten, eta ez zitzaien hileta-elizkizunik egin.
Maringo parrokoa zen Jorge Iturrikastillo elgetarraren kasua da. 1936ko azaroaren 1ean atxilotu eta azaroaren 7an Artikutzan (Oiartzun) fusilatu zuten. Bando frankistakoek salataritzat hartu zuten Iturrikastillo, eta salatu zuten parrokoak gazteak konbentzitzen zituela gorriekin borroka zezaten. Horregatik, beste 200 hildakoekin lurperatu zuten, gurutze barik.
Ahaztutako apaizak
Polemika sortu zen 2007ko urriaren 28an Espainiako Elizak 498 erlijioso eta erlijiosa beatifikatzeko prozesua hasi zuenean. Askok bidegabekeriatzat jo zuten Elizak talde bakarreko erlijiosoak omentzea. Eskoriatzako Ezker Batua-Berdeek, esaterako, Maringo apaiza izandakoa izan zuten gogoan, eta salatu zuten Elizak abiarazitako beatifikazio prozesu horren helburua oroimen historikoaren kontra egitea zela.