"Kalea ez dago oraindik zabalik", adierazi du Agenda 21eko Edorta Silvak. "Zerbitzuak sartzen dihardute. Arkupean egindako zuloak hormigoiarekin estali dituzte eta orain asmoa da asfaltatzea".
Silvak ez du datarik zehaztu, baina adierazi du laster hasiko dituztela bigarren faseko lanak. Hau da, Salbador kaleko goiko aldean egitekoak direnak. "Asteon esango digute obrako arduradunek lanen egoera zehatza zein den. Orduan erabakiko dugu bigarren faseko lanei hasiera emateko moduan garen edo ez".
Lan horiekin hasteko itxi egin beharko dute Salbador kalea. "Udalak garaiz emango du jakitera zati horretan noiz hasiko diren. Ezingo dira karga-deskarga guneak erabili, ezta kaleko garajeak ere", gogoratu du Silvak.
Urtarrilean hasi zituzten Salbador kaleko lanak. Sei edo zazpi hilabeteko iraupena izango dute.