Zarata asko atera barik, hilaren 3an Aitor Bolinagak eta haren laguna den Juan Bautista Valdubieco Tximis-ek egundoko marka egin zuten. Aixolako urtegiari 23 itzuli eman zizkioten lasterka. 100,6 kilometro egin zituzten 09:32:15eko denboran.
"Erronka handia zen eta ez genekien lortuko genuen", adierazi du Bolinagak. "Horregatik, ez genuen jende gehiegi jakinaren gainean jarri. Azkenean, baina, kristo guztia enteratu zen eta jende asko joan zen gu animatzera".
Ondo baino hobeto ezagutzen dute Aixolako urtegia Bolinagak eta Valdubiecok. "Gehienetan bertan egiten ditugu entrenamenduak. Urkulun eta Landan ere ibiltzen gara, baina Aixola gertu dugu eta leku lasaia da", esan du elgetarrak. "Ondo amaitu nuen, burutik hanketatik baino hobeto. Gogorra baina polita izan zen
22 maratoi mundu osoan
Bolinagak 49 urte ditu eta duela hamar bat hasi zen maratoietan eta ultra-maratoietan. Hegoafrikan, Argentinan, Norvegian, Jordanian... leku askotan izan da, baina lasterketarik gustukoena Donostiako maratoia du. Zergatik egin duten Aixolako marka? "Gorputza proban jartzearren", esan du. Eta besteren bat prestatzen ari omen dira!