Astelehenean, hilaren 22an, egin zuen Egokik ikasturteko lehenengo batzarra. Bertan, aurreko ekitaldiko balorazioa egin zuten. Gainera, azaroa eta abendua bitartean burutuko dituzten ekintzak zehaztu zituzten.
Balorazio positiboa
"Otsailetik uztailera bitartean egindakoarekin pozik gara", azaldu du kiroletako udal teknikaria den Oskar Carrascalek. "Zazpi ekintza kaleratu genituen. Izenemate faltagatik bi bertan behera gelditu ziren. Gainerakoak, bost, oso harrera ona izan zuten".
Egiteke gelditu zirenak bizikleta irteera Bardeetara eta mendi buelta Udalaitzera izan ziren. "Arrakastatsuena patinaje ikastaroa izan zen", gogoratzen du Carrascalek. "Bi talde osatu ziren, hastapenekoa bata eta trebetasun mailakoa bestea. Guztira, 40 lagun aritu ziren ikastaro horretan, 20 bakoitzean".
Bi hilabeteotan, lau ekintza
Datozen bi hilabeteotan, lau ekintza kaleratuko ditu Egokik. Azaroaren 18an Elgetako lau handiak egiteko aukera emango du. Abenduan umeendako esku-pilota txapelketa egingo dute Eskola Kirola programan txertatua. Boleta txapelketa ere jokatuko dute.
Urteko azken ekintza hilaren 23an egingo du Egokik, Olentzero egunean. Mendi irteera antolatu du Egokik egun horretarako Intxortara. Olentzero Intxorta menditik jaisten omen da Elgetara eta Olentzeroren arrastoaren bila irtengo dira plazatik herriko umeak. Ekintza horien berri garaiz emango du Egokik.