Elgetako udalak gehiago jakin nahi du 36ko gerraren inguruan eta lehenengo aldiz ikerketa bultzatzeko beka atera du. Guztira, 12.000 euroko beka da. Eusko Jaurlaritzak ipiniko ditu 8.000 euro. "Helburua da 36ko gerraren eta Elgetaren arteko lotura nolabait jasotzea", adierazi du Oxel Erostarbe alkateak. "Bere egunean udalak parte hartu zuen Eibarren eta 36ko gerraren inguruan Jesus Gutierrez historialariak egindako liburuan, baina oraingo asmoa da ikerketa Elgetan zentratzea".
Apirilerako amaituta
Gaia zabalik laga du udalak eta jasotako proposamenen artean aukeratuko du gehien interesatzen zaiona. Apirilean 73 urte beteko dira Elgetako frontea jausi zela. Ordurako ikerketaren emaitza mahai gainean edukitzea nahiko luke Udalak. Egindako lana zein formatutan jaso (liburua, ikus-entzunezkoa...) proiektuaren ezaugarriek esango dute.
Ez da 36ko gerraren inguruan Elgetako udalak bultzatu duen lehenengo ekimena. Martxan dituzte gerraren inguruko ibilbide tematikoaren proiektua zein lubakiak berreskuratzeko ekimena. Harrera gunea egiteko asmoa ere mahai gainean dute.