Irualde Bat enpresa eraikitzailea Elgetako Domingo Iturbe kalean egiten ari den etxebizitzetan egin dute lapurreta. "Zapatu eguerdian guztia ondo utzi zuten langileek", esan digute enpresa eraikitzailean. "Astelehenean galdarak falta ziren. Zapatu eguerditik aurrera egindako lapurreta izan da".
Unifamiliarretan eta bifamiliarretan
Etxebizitza unifamiliarretan eta bifamiliarretan egin dute lapurreta. "Profesionalek egindako lanak dirudi", adierazi dute enpresa eraikitzailetik. "Leihoak apurtuta sartu dira etxebizitzetan eta galdarak ondo desmuntatu dituzte. Torlojuak banan-banan aterata".
Duela bi aste, Bergaran
Ez da Debagoienean galdarak lapurtzen dituzten lehenengo aldia. Duela bi aste antzerako lapurreta izan zuten Bergaratik Antzuolarako bidean Artzamendi enpresa eraikitzailea egiten ari den etxebizitzetan. "20 galdara lapurtu dizkigute", baieztatu dute Artzamenditik. "Ipinita zeuden galdarak eta ezer apurtzeke eraman dituzte. Sartzeko, hori bai, leihoak apurtu zituzten lapurrak". Artzamendik esan dute aseguru etxea egingo dela lapurretaren kargu eta honek ez dituela lanak atzeratuko. Galdarak berriz eskatu behar izan dituzte eta azaldu dutenez oraingoan ez dituzte azken unera arte jarriko.