Apustu segurua da Yllana Elgetako Espaloia Kafe Antzokian. Honakoan ere ez dute huts egin. Ez dira oraindik hiru hilabete igaro Pagaganini izeneko obrarekin Yllana azkenekoz Espaloian izan zenetik eta Madrilgo antzerki taldeak 220 lagun inguru eraman zituen Espaloira barikuan.
Buuu! antzezlanean magiarekin ausartu dira Yllanakoak eta erakutsi dute ez direla batere mago kaskarrak.
Ordubeteko emanaldia egin zuten Hamaika trikimailu egiten ikusi genituen. Zapi bat makila bihurtu zuten eta makila atzera zapi. Sua arrosa bihurtu zuten eta beltz koloreko zapi bat motadun egin zuten. Zapiak kolorez aldatzen ere ikusi genituen, baita soka batekin trikimailuak egiten. Mahai batekin ere aritu ziren jolasean. Lurretik altxatu zuten birritan ukitu barik.
Publikoarekin jolasean
Barikukoa izan zen Yllanakoendako 2007ko birako azken emanaldia. Oporren usainean giro berezia zuten euren artean eta elkarri adar joka aritu ziren eszenatokian. Inprobisazio bat baino gehiago egon zen. Publikoak ere izan zuen bere tartetxoa. Barre algara handienak une horretan egin genituen.