Elgetari dagokionez, bi errepide zatitan egingo dituzte lanak: Jalotza baserriaren paretik Altube baserriaren parera, batetik; eta bestetik, Pagatza industrialdetik Bizkaiko mugara. Bien arteko zatia aurrez konponduta dago. GI-2632 Bizkaiko mugatik Elgetako lurretara doan zatian arekak (kunetak) altxatu dituzte.
Zorua eta arekak berritu
Zoruaren egitura berritzeko ohiko prozedura erabiliko dute; hau da, dagoen zorua altxatu eta ondoren hainbat geruza ipini zoruari oinarri sendoa emateko, eta beste geruza bat zorua amaitzeko. Arekak ere berritu egingo dituzte.
Lanak amaitzeko lau hilabeteko epea aurreikusi du Foru Aldundiak; baina eguraldia dela-eta izan daiteke gorabeherarik.
Lanak egunez egingo dituzte eta errepidea itxiko ez bada ere, seinale eta semaforo bidez mugatu egingo dutela jakinarazi nahi diete gidariei.