Elgetako Udaleko EAJ-EAko zinegotzi taldeak prentsa ohar baten bidez gezurtatu egin ditu Elgetako Aralarrek orain dela gutxi egindako adierazpenak. Legealdi honetan ohikoa gertatzen ari den bezala gehiegikeriaz, zurikeriaz eta sentsazionalismoz egindako adierazpenak izan dira, euren esanetan.
Honela, herritarrak lasaitu nahi dituzte zera esanez: Legealdi honetarako onartutako konpromiso guztiak aurrera doaz: industrialdea handitzea, Espaloia, eguneko zentroa, etxebizitza berriak, saihesbidea... Gure herriko ongizatearen alde lanean jarraituko dugu dagokigun seriotasunez eta zorroztasunez.
Zuzenketa
Bestalde, atsekabea azaldu dute Udalean elkarlana baino iskanbila nahiago duten ordezkari politiko batzuekin batera egoteagatik.
Idatzi honetan diote aspertuta daudela euren jarrera arduragabe eta kaltegarriarekin. Beraz, Aralarrek egindako salaketei erantzun zehatz eta publikoa emango diete. Talde politiko honi behingoz bere harrokeria alboratu eta egin dituen adierazpenak zuzentzea besterik ez diogu eskatzen, esan dute.