Udaletik jakinarazi digutenez, iazko abenduaren 13an hasi eta aurtengo apirilaren 3ra bitartean pilotalekuko argiak piztuko dituzte astean zehar nahiz jai egunetan arratsaldez.
Horretarako, ordutegi zehatz bat ipini dute: Astelehenetan 16:30etik 18:30era; martitzenetan, eguaztenetan eta eguenetan 16:30etik 18:00etara; eta barikuetan eta asteburuetan 17:00etatik 19:00etara.
Zehaztutako ordutegi horren barruan edozeinek erabili ahal izango du pilotalekua jolasteko edo kirola egiteko.
Erretserbak
Hala ere, arduradunek argi utzi nahi dute denbora tarte hori erabilera librekoa izango dela. Beraz, pilotalekua ezingo dute pertsona gutxi batzuk euren jolasetarako soilik hartu. Ordutegi horretatik kanpora pilotalekua hutsik egon beharko da. Izan ere, erretserba egina dutenek bakarrik erabili ahal izango dute. Pilotalekua alokatu nahi dutenek Udal Kirol Zerbitzura edo Kiroldegira jo beharko dute informazio eske.