Udal pilotalekuaren egoera nahiko kaskarra da, batik bat teilatuarena, eta behin eta berriz hitz egin da herrian frontoia konpontzeko beharraz.
Hori dela eta aurtengo Udal aurrekontuetan, berritze proiektua egiteko diru kopuru bat zehaztu zuten.
Udalak hiru arkitektori eman zien proiektua egin nahi izanez gero euren eskariak aurkezteko aukera. Jadanik jaso dituzte eskariak eta orain Gobernu batzordean erabaki behar dute Udal ordezkariek zein proposamen den egokiena.
Ondoren, aukeratutakoak hiru hilabete izango ditu proiektua bera gertatzeko. Beraz, urtarrilaren amaierarako eginda izatea espero dute Udalean.
Berrikuntzak
Pilotalekua berritzeko lanen artean honako hauek aurreikusi dituzte:
-Ezkerreko horma altxatzea.
-Teilatu zaharra kendu eta aldatzea.
-Biltokia egokitzea.
-Tabernaren eta frontoiaren arteko atea eserlekuen aldera mugitzea
-Lurra eta sarrerako ateak aldatzea
-Eserleku batzuk kendu eta mugikorrak ipintzeko aukera aztertzea.
-Berogailu sistema aldatzea.
Hauek dira proiektua egiteko adituek kontuan hartu beharko dituzten aldaketak.