Udaleko gorabeherak eta egungo egoera politikoa gai hartuta, herri batzarrerako dei egin zuen Elgeta Auzolanian plataformak. Joan zen barikuan egin zen bilera eta 25 lagun inguru izan ziren.
Elgeta Auzolanian plataformakoak pozik azaldu ziren jasotako erantzunarekin, jendeak bilerara joateaz gain, bertan parte hartu baitzuen iritziak emanez.
Dagokion zinegotzia eskatu
Edurne Alberdi Elgeta Auzolanian plataformako zerrendaburuak adierazi digunez, orain arteko dinamika berarekin jarraituko dugu Udalean. Bilkuretan mozioak aurkeztuko ditugu eta bertan egongo gara gure iritziak emateko; batzordeetan ere parte hartuko dugu. Hala ere, herritarren nahia errespetatuz dagokigun zinegotzia eskatzen jarraituko dugu, eta aldarrikapen hori eginaz mozio bat aurkeztu dugu Udalean, esan digu Alberdik.
Aralarren proposamena
Aralar alderdiak, bere iraileko berripaperean, proposamena egin zuen Auzolanian-ek Udaleko erabaki-guneetan parte hartzeko. Aralarren esanetan, errespetatu egin behar da hauteskundeetan herritarrek esandakoa. Ondorioz, Elgeta Auzolanian plataformari zinegotzi bat dagokio. Legeak Udalaren gainean inolako neurririk hartu ez dezan herri batzarra sortzea proposatzen dugu.
Aralarrek esandakoaren arabera, herri batzar horretan alderdi guztiek hartuko lukete parte botoarekin. Ondoren, bertan lortutako akordioak batzar ofizialak onartu beharko lituzke.
Elgeta Auzolanian-ek, ordea, Lizartzan egin zen saiakeraren antzerako bat eginez, EAJ-EAkoek euren zinegotzi bat utzi eta leku hori Edurne Alberdik hartu behar lukeela uste dute. Aukera hau Aralarrek proposatutakoa baino egokiagoa da euren esanetan. Baina horretarako EAJ-EAk erakutsi behar du borondatea.
Gai horren gainean, alkateak ez du inolako adierazpenik egin. Bere iritziz, horri buruz esan beharreko guztia esana dago.