Espainiako Gerra Zibila aspaldi amaitu zen arren, zauriak ez dira erabat itxi. Eta ez da horrelakorik gertatuko, fusilatuen senideek egia osoa jakin arte. Iaz hasi ziren, Debagoienean, gerran fusilatutako gorpuzkiak aurkitzen. Aranzadi zientzia elkartearen laguntzarekin, Arrasateko Bedoña auzoan aurkitu zituzten horietako batzuk.
Ordutik hona Debagoieneko fusilatuen eta senideen batzordea etengabe ibili da lanean, eta duela astebete, beste aurkikuntza bat egin zuten Elgetan.
Ez dute zehaztu lekurik, baina, Elgetan bizi den lekuko baten esanetan, faxistak herrira sartu zirenean bere aita eta beste zazpi gudari hil zituzten. Gero, hegazkinek botatako bonba baten ondorioz egindako zulo batean ehortzi zituzten. Lekuko horrek bere aita handik atera eta hilerrira eraman zuen. Hortaz, zazpi gorpuzki egongo dira. Tartean, arrasatearrak eta azpeitiarrak daude.