Hainbat etxebizitza eraiki dituzte azkenaldian Elgetan, eta beste zenbait gehiago eraikitzeko bidean daude.
Torrealdean lehen etxebizitza blokerako zimenduak ipintzen diharduten bitartean, Uriburun etxebizitzak egiteko behin-behineko plana presta dezaten eskatzea adostu dute Udaleko Gobernu batzordean.
Toledo taldeari emango diote Uribururako plana gertatzeko ardura. Lan horren truke 20.882,23 euro jasoko ditu, eta proiektuak bi hilabeteren buruan egon beharko du amaituta.
Txaletak eta etxe adosatuak
Arau subsidiarioen arabera, guztira 66 etxebizitza eraikiko dituzte Uriburu inguruan. Horietatik 48 libreak izango dira, txaletak batzuk eta etxebizitza adosatuak besteak. Bakoitzeko zenbat egingo diren Toledo taldeak prestatuko duen planean zehaztuko da. Gainontzeko 18 etxebizitzak, berriz, babes ofizialekoak izango dira.
Oraindik data zehatza jakinarazi ez badute ere, eraikuntza lanei hasi berri den 2004 urtean ekingo dietela espero da.