Elgetako EAJ-EA koalizioak prentsa oharra kaleratu du kritikatzeko Aralar-ek gobernu batzordean duen jarrera. Patxi Basaurik esan digunez, Udal gobernua kolokan dago baldin eta Aralar-ek jarrera aldatzen ez badu. EAJ-EAk dio alderdi horren jarrera kaltegarria dela Udalaren funtzionamendu onarendako. Aralar-ekoek herri ordezkariena baino kazetari senzazionalisten jarrera erakusten dute eta beti dabiltza hedabideetan komunikatuak eta faltsukeriak ateratzen gaineratu du Elgetako alkate Patxi Basaurik.
Saihesbidearen proiektua eta mendi museoa
Elgetako Udalak hartutako zenbait erabaki eta abiarazitako bi proiektu daude eztabaidaren gunean. Saihesbidearen proiektua eta mendiko museoa, hain justu ere. Koalizioaren esanetan Aralar-ek ez du egia esan saihesbidearen gaineko jestioen inguruan, ezta mendi museoaren inguruan ere. Hori horrela, Gobernu Hitzarmena berehala ezeztatzeko prest agertu da Patxi Basauri.
Aralar alderdiaren erantzuna
Aralar-eko ordezkari Oxel Erostarberen esanetan, arazoak ezin ditugu hedabideetan konpondu eta bilera bat egin beharko genuke krisia bideratzeko. Aralarrek Gabonetan egin zion eskaria bilera egiteko EAJ-EA koalizioari, baina Erostarbek esan digunez, oraindik ez dira elkartu, EAJ-EAkoek ez dutelako nahi izan.
Erostarbek gaineratu du prest daudela herritarren aurrean eztabaida egiteko, besteak beste, ez dugulako ezertxo ere ezkutatzeko. Gobernu Batzordean eztabaidatzen dituzten gaiak herritarren interesekoak direlako gardentasunez jokatzea gustatzen zaiela adierazi du Aralar alderdiko zinegotziak. Oposiziora joateko beldurrik ez dutela ere gaineratu du Oxel Erostarbek.
Prentsa oharrak
Jarraian gaiaren gainean bi taldeek Goienkarira bidalitako 4 prentsa oharrak, daten arabera sailkatuak: