"Euskal Herrian sei bat lagun gara pegatinen bilduma egiten dugunak", Iñaki de Nicolas barakaldoarraren hitzak dira. Eguaztenean ipini zuen erakusketa Espaloian, eta pegatinak eskatzeko baliatu du aukera. Esan digunez 50.000 pegatinatik gora ditu etxean, guztiak aldarrikapenen bat islatzen dutenak. "Edozein ideologiatako pegatinak batzen ditut, baldintza da aldarrikapenen bat egitea". Erakundeka sailkatzen ditu, eta konturatu da urte hauetan guztietan asko aldatu dela pegatinen mundua. "Lehen euskara batuan egiten ziren eta orain joera da tokian tokiko euskara erabiltzea. Gainera, eskuz egitetik ordenagailuz egitera pasa gara".
Euskara pegatinetan
Espaloian euskararen aldeko pegatinak ditu ikusgai, besteak beste ikastolen, Korrikaren eta euskalki ezberdinetan ateratakoak. Hil amaierara arte egongo da horiek ikusteko aukera.