Haizea Misol izan zen ringera igotzen lehenengoa, eta Sorabox Durangoko haizea Larudoren kontra indartsu hasi bazen ere, hirugarren roundera erabat lehertuta iritsi ziren bi boxeolariak. 16 urteko gazteak izanda, badute hauspoa lantzeko eta esperientzia hartzeko denbora. "Lehenengo roundean oso ondo ikusi dut Haizea, baina egia da ondoren beherakadatxoa izan duela. Hala ere borrokaldia irabazteko kapaz izan da, horrenbestez, ondo", adierazi zuen haren entrenatzaile eta jaialdiko antolatzaile Ixa Rodriguezek.
Bailarakoen artean Oier Nuñez izan zen hurrengoa ringera igotzen, arratsaldeko hirugarren borrokaldian. Bergarakoa oso ondo ibili zen Nafar Sustraiakeko Alvaro La Fuenteren kontra. "Gaur Oier, Oier izan da, berak dakien moduan borrokatu du eta oso ondo ikusi dut, oso borrokaldi ona egin du", adierazi zuen Rodriguezek. Eta, iluntzeko seigarren borrokaldian igo zen ringera azken debagoiendarra, hau ere Bergarakoa, Mikel Garagorri. Harmailetan lagun asko zituen animoak ematen, eta Garagorrik ez zuen kale egin. Iparboxeko Aritzen kontra oso ondo jardun zuen. "Hiru roundak egin ditu onak, ez du bakarrean hutsik egin, oso pozik gaude gaur hiru boxeolari hauek emandako mailarekin".