ELAren esanetan Hego Euskal Herritik jorratzea lehenetsiko du: "Horregatik lanean jarraitzen du etxebizitzako sindikatuekin eta gainerako eragile sozial eta sindikalekin erakunde guztiekiko presioa handitzeko, batez ere EAEn eta Nafarroan, hemengo Gobernuek arlo horretan eskumen zabalak baitituzte".
Gaineratu du hurrengo egunetan jakinaraziko dituela greba horren gaineko xehetasunak.
LAB ere prest
LAB ere greba orokorrerako prest agertu da, eta deialdia adosteko lanetan dabiltzala beste sindikatuekin adierazi du.
Etxebizitza lehen mailako kezka soziala dela Euskal Herrian diote eta gaineratu dute neurriak behar direla aurre egiteko: "Etxebizitza larrialdiari aurre egiteko egiturazko neurriak behar dira, eta horretarako presio egin behar da. Ardura du Espainiako Gobernuak, baita EAEko eta Nafarroako gobernuek ere". Eta honako neurriak zehaztu dituzte: alokairu mugagabeak ezarri eta etxebizitza prezioak jaisteko esku hartzea; etxegabetze guztiak gelditzeko konpromisoa; putre funtsen esku dauden etxebizitzak berreskuratzeko neurriak, eta errentismoa elikatzen duten politika publikoak amaitzea, besteak beste.
CCOOek eta UGTek atzo
Atzo, ostera, CCOOek eta UGTk greba orokorra deitu zuten udazkenerako, soldata eta etxebizitza duinak lortzeko aukera aldarrikatzeko. 24 orduko lanuztearen data zehatza plataforma sozialekin eta Maizterren Sindikatuarekin batera zehaztuko dutela adierazi zuten.