Arrasateko Ttakun taldeak dagoeneko 33 urte beteko ditu eta bertako kide izan zen Jesus Larrañaga. 2025ean hil zen eta taldean egindako lana eta konpromisoa eskertu nahi dizkiote kideek; horregatik, txalaparta saioak egingo dituzte hura gogoan: "Jesusek esaten zuen bezala: Txalapartia jo ezazue keia atera arte!".
Zapatuan, 10:30ean abiatuko dira Aramaioko Azkoaga auzotik eta 12:00etan, Danborralden, txalaparta saio libreak eta hamarretakoa egingo dituzte. Ekitaldia irekia izango da eta jatekoa egongo dela gerturatzen diren guztientzat iragarri dute.
Mendi bueltaren ostean Ibarrara jaitsiko dira eta txalaparta-poteoa egingo dute; ondoren, bazkaltzeko elkartuko dira Barajuen auzoan. Arratsaldeko ekitaldiak Arrasaten egingo dituzte, 18:30etik aurrera txalaparta doinuak entzungo dira herriko kaleetan.
Egitaraua:
- 10:30 Irteera Aramaiotik –Azkoaga auzotik–.
- 12:00 Danborralde mendian Jesus Larrañagari omenaldia: txalaparta saio libreak eta hamarretakoa.
- 13:30 Txalaparta-poteoa, Aramaion.
- 14:30 Bazkaria, Barajuen auzoko Koskoltegi elkartean.
- 18:30 Txalaparta-poteoa, Arrasaten.