Maren Lezeta futbolari aretxabaletarrak Realarekin jokatu zuen berriro, belauneko lesio baten ondorioz urtebete zelaietatik kanpo egon eta gero. Realak Chelsearen aurka Zubietan jokatutako partidan 83. minutuan zelairatu zen, Paula Fernandezen ordez. Txapeldunen Ligako kanporaketako itzuliko norgehiagokan "amets bat" bizi izan zuen.
Lezetak ez zuen partidarik jokatu joan den denboraldian. Ezker belauneko kanpoko meniskoan izandako lesio baten ondorioz ebakuntza egin behar izan zioten, iazko irailean. Ordutik egindako errekuperazio prozesu luzearen ostean iritsi da itzulera. "Zelaira sartu naizenean sinetsi ezinda nengoen", adierazi zuen partidaren ostean. Urtebeteko prozesua luzea izan dela aitortu zuen: "Gaizki pasatzen den momentuetan aldapa gora jartzen da dena, baina lortu dut itzultzea".
Isasiasmendiren debuta, joaneko partidan
Ane Isasisasmendi oñatiarrak, aldiz, joaneko partidan egin zuen debut ofiziala Realarekin, 91. minutuan zelairatuta. Aurten lehen taldearen dinamikan ari den arren, atzoko itzuliko neurketan ez zituen minuturik jokatu.
Kirol arloan, Realak ezin izan zion buelta eman joaneko 5-2ko emaitzari. Chelseak 0-1 irabazi zuen Zubietan, eta Txapeldunen Ligatik kanpo geratu dira txuri-urdinak.
