Goiena Komunikazio Taldeak Danbaka 2004an sortu zuenean, bi urtean behin egiteko asmoz sortu zuen. Eta ederrak izan ziren 2004ko, 2006ko, 2008ko eta 2010eko Elgetako Espaloia Kafe Antzokiko edizioak. Gero, etenaldi luzea etorri zen, arrazoi ezberdinak zirela medio, eta 2022ra arte ez zen egin.
Eta 12 urteko lozorroaren ostean, 2022an indartsu itzuli zen Danbaka, Bergarako Seminarixora lekuz aldatuta, Debagoieneko askotariko musika proiektuak protagonista, aurreko edizioetan bezala. 2022ko bosgarren aldiaren ostean, 2024an seigarrena antolatzera animatu zen Goiena eta 2026rako prestaketekin hasita geundela, hausnarketa sakon bat medio, atseden hartzea erabaki da: "Batzuetan, etorkizuna bermatzeko geratzen jakin behar delako".
Lapikoa salda berriaren zain dago
Ibilbide emankorreko musika taldeek etenaldiak egin ohi dituzten bezala, etenaldi bat egitea erabaki du Danbakak, etorkizunean ere orain arte bezain emankorra izan dadin: "Zergatik? Sentsazioa dugulako Debagoiena oso bailara musikazalea izanda ere, ez duela azken bi urteetan halako ekimen bat antolatzeko beste proiektu berri eman. Alegia, salda berriaren zain dagoela lapikoa, eta su-txikian kozinatzen dena beti denez zaporetsuagoa, zazpigarren edizioa 2028an antolatzea erabaki dugu".