2025eko emaitzak, urtean zehar abiarazitako proiektuak eta aurrera begirako erronkak izan ditu hizpide Fagor Taldeko batzar nagusian. 2025ean, osotara, 1.735 milioi euroko salmentak izan zituen Fagor Taldeak.
“Beste urte batez, Fagorreko kooperatibek berretsi dute egoera zailei aurre egiteko eta berrietara moldatzeko gai direla. Mundu mailako testuinguruek merkatuen ezegonkortasuna eragin dute, eta, egoera horretan, erabaki garrantzitsuak hartu behar izan dira”, azaldu du Joxean Alustiza Usandizaga Fagor Taldeko lehendakariak.
Fagorreko ordezkarien esanetan, "enpresa txinatarrak Europako merkatuan sartu ondotik aldatu egin dira egiteko erak", eta “berrasmatu beharra” egon da. Fagor Ederlan, esaterako, "azken urratsak egiten ari da Leapmotor marka txinatarraren auto elektrikoen zenbait modelorentzat egiturazko osagaiak hornitzeko" —Zaragozako ekoizpen lantegia egokitu eta berrirekiko du horretarako—. Egiteko erara mugatu barik, "dibertsifikazio estrategietan sakontzen" ere ari dira Fagorreko kooperatibak. Horren adibide da Fagor Arrasatek, Funditec ikerkuntza zentroarekin batera, robot humanoide industrialak diseinatzeko, garatzeko eta fabrikatzeko egin duen apustua.
Lehendakari aldaketa
Gainera, atzoko batzar nagusian, hamasei urteren ostean, presidente moduan agur esan zuen Joxean Alustizak. Bere kargua Mondragon Assembly kooperatibako lehendakari Igor Herrartek hartuko du. Alustizak, hunkituta, bidelagun izan direnei eskerrak emanez bukatu du lehendakaritza: “Ohore bat izan da urte luze hauetan Fagorreko lehendakari izatea. Esker on hitzak besterik ez dauzkat konfiantza eskaini didazuen kooperatibetako kideentzat. Lasai noa, Fagorrek bere esentzia mantentzen duelako; eta pozik noa, etorkizun handia eta oparoa ikusten diodalako hain gurea den proiektu kooperatibo honi”.