Eusko Jaurlaritzak eta EUDELek udal euskaltegien egonkortasuna indartzeko finantziazio-sistema berria aurkeztu dute gaur goizean Eusko Jaurlaritzaren Gasteizko egoitzan. Euskararen erabilera soziala bultzatzea helburu duen Jauzia gara proiektuaren bueltan egin da akordioa, hain zuzen, udal euskaltegien finantza-egonkortasuna indartzeko, kudeaketa administratiboa errazteko eta sistema euskaltegien gaur egungo errealitatera egokitzeko.
Eredua eguneratu
Aurkezpenean adierazi dutenez, "euskaltegien finantziazioari egonkortasuna" eta "epe luzerako ikuspegia" emango dion akordioa izango da, eta orain arte indarrean egon den eredua eguneratuko du "kudeaketa administratiboa sinplifikatuta eta udalen zein euskaltegien plangintza-gaitasuna" indartuta.
Besteak beste, Ibone Bengoetxea lehendakariordeak eta Esther Apraiz EUDELeko presidenteak hartu dute hitza, eta Bengoetxeak azpimarratu du akordioa "ez dela neurri isolatu bat", eta Eusko Jaurlaritzak Jauzia Gara estrategiaren barruan dagoen "helduen euskalduntzearen sisteman bultzatzen ari den eraldaketa zabalago baten parte dela". Apraizek, aldiz, akordioak "hizkuntza eskubideak, gizarte kohesioa eta aukera berdintasuna" indartzen dituela adierazi du, eta "funtsezko urrats bat" egin dutela gaineratu du.
Finantziazio handiagoa
Hori horrela, akordioak Udal euskaltegien finantziazio sistema berria ezarriko du 2026-2027 ikasturtetik aurrera. Eusko Jaurlaritzak udal euskaltegietara bideratutako finantziazioa %7 igoko du: hain zuzen, 14,1 milioi euroetatik 15,1 milioi euroetara.
Adierazi dutenez, akordioak zenbait ekimen abian jartzea aurreikusi dute "bi erakundeen arteko koordinazioa indartzeko". Esaterako, "matrikulazio-kanpaina bateratuak" egitea eta "HABEren eta EUDELen arteko "jarraipen-batzorde bat" sortzea.